ცოტა რამ ყველასთვის საყვარელი ავტორის შესახებ 🤗

ჯოან როულინგი დაიბადა 1965 წლის 31 ივლისს, ბრისტოლის მახლობლად, იეიტის საერთო საავადმყოფოში და გაიზარდა ინგლისში, გლოსტერშირში და სამხრეთ-აღმოსავლეთ უელსში, ჩეპსტოუში, გვენტში.

მისი მამა, პიტერი, ბრისტოლში, Rolls Royce-ის ქარხანაში თვითმფრინავების ინჟინერი იყო, ხოლო დედა, ენი, Wyedean Comprehensive-ის ქიმიის განყოფილებაში მეცნიერ-ტექნიკოსი, სადაც თავად ჯო სწავლობდა. ენს გაფანტული სკლეროზის დიაგნოზი ჯო მოზარდობის ასაკში დაუსვეს და 1990 წელს, ჰარი პოტერის წიგნების გამოქვეყნებამდე გარდაიცვალა. ჯოს ასევე ჰყავს უმცროსი და, დი.

პატარა ჯო წიგნების გარემოცვაში გაიზარდა. „მე წიგნებისთვის ვცხოვრობდი“, - თქვა ერთხელ მან. „მე ვიყავი ერთი ჩვეულებრივი წიგნის ჭია, ჭორფლიანი, და მხედველობის სათვალით“.
ჯოს ადრეული ასაკიდან სურდა მწერალი გამხდარიყო. პირველი წიგნი ექვსი წლის ასაკში დაწერა - მოთხრობა კურდღელზე, სახელწოდებით „კურდღელი“. სულ რაღაც თერთმეტი წლის ასაკში მან პირველი რომანი დაწერა - შვიდ დაწყევლილ ბრილიანტსა და მათ მფლობელებზე.

ჯო სწავლობდა ექსეტერის უნივერსიტეტში, სადაც ფრანგულისა და კლასიკური ლიტერატურის სასწავლო გეგმის გარდა იმდენად ბევრს კითხულობდა, რომ უნივერსიტეტის ბიბლიოთეკაში დაგვიანებული წიგნებისთვის 50 ფუნტი სტერლინგის ჯარიმა დააკისრეს. კლასიკური ლიტერატურის ცოდნა ერთ დღეს გამოადგა ჰარი პოტერის სერიის შელოცვების შესაქმნელად, რომელთაგან ზოგიერთი ლათინურ ენაზეა დაფუძნებული.

მისი უნივერსიტეტის კურსი მოიცავდა პარიზში ერთი წლის გატარებას. „სტუდენტობისას ერთი წელი პარიზში ვცხოვრობდი“, - დაწერა ჯომ Twitter-ზე 2015 წელს იქ მომხდარი ტერორისტული თავდასხმების შემდეგ. „ეს ჩემი ერთ-ერთი საყვარელი ადგილია დედამიწაზე“.
დიპლომის მიღების შემდეგ ის ლონდონში გადავიდა საცხოვრებლად და სხვადასხვა სამსახურში მუშაობდა, მათ შორის Amnesty International-ში მკვლევრად. „იქ, ჩემს პატარა კაბინეტში, ვკითხულობდი ნაჩქარევად დაწერილ წერილებს, რომლებიც ტოტალიტარული რეჟიმებიდან ფარულად გამოჰქონდათ მამაკაცებსა და ქალებს, რომლებიც პატიმრობას რისკავდნენ, რათა გარე სამყაროსთვის ეცნობებინათ, თუ რა ხდებოდა მათ თავს“, - თქვა მან მოგვიანებით. „ამ პროცესში ჩემი მცირე მონაწილეობა ჩემი ცხოვრების ერთ-ერთი ყველაზე ძნელი და შთამაგონებელი გამოცდილება იყო“.

ჯოს ჰარი პოტერის იდეა 1990 წელს გაუჩნდა, მანჩესტერიდან ლონდონის კინგს კროსისკენ დაგვიანებულ მატარებელში ჯდომისას. მომდევნო ხუთი წლის განმავლობაში მან სერიის შვიდივე წიგნის დაგეგმვა დაიწყო. ის ძირითადად ხელით წერდა და თანდათანობით უამრავ ჩანაწერს აგროვებდა, რომელთაგან ბევრი ქაღალდის უცნაურ ნაჭრებზე იყო დაწერილი.

ერთხელაც ჩანაწერები წაიღო და ჩრდილოეთ პორტუგალიაში გადავიდა საცხოვრებლად, რათა ინგლისური ენა, როგორც უცხო ენა, ესწავლებინა, 1992 წელს ხორხე არანტესზე დაქორწინდა და 1993 წელს ქალიშვილი, ჯესიკა, ეყოლა. როდესაც ქორწინება იმავე წელს დასრულდა, ის დიდ ბრიტანეთში დაბრუნდა, რათა ედინბურგში ეცხოვრა ჯესიკასთან და ჩემოდანთან ერთად, რომელშიც „ჰარი პოტერისა და ფილოსოფიური ქვის“ პირველი სამი თავი იდო.

ედინბურგში ჯომ მოსწავლეების მომზადება დაიწყო და ასევე ასწავლიდა ქალაქის სკოლებში, თუმცა თავისუფალ დროს წერას განაგრძობდა.

სრული ხელნაწერის დასრულების შემდეგ, მან პირველი სამი თავი რამდენიმე ლიტერატურულ აგენტს გაუგზავნა, რომელთაგან ერთ-ერთმა მისწერა და დანარჩენის ნახვა სთხოვა. ის ამბობს, რომ ეს იყო „საუკეთესო წერილი, რაც კი ოდესმე მიმიღია ცხოვრებაში“.

წიგნი პირველად Bloomsbury Children’s Books-მა 1997 წლის ივნისში გამოსცა ჯ.კ. როულინგის სახელით.

„K“ მისი მამის მხრიდან ბებიის, კეტლინის, სახელია. ის მისი გამომცემლის თხოვნით დაემატა, რომელსაც მიაჩნდა, რომ აშკარად ქალი ავტორის წიგნი შეიძლება არ მოეწონებინა ახალგაზრდა ბიჭების სამიზნე აუდიტორიას.

წიგნი აშშ-ში Scholastic-მა იგივე ფსევდონიმით (ისევ გამომცემლის თხოვნით) გამოსცა - „ჰარი პოტერი და ფილოსოფიური ქვა“, 1998 წელს. ჰარი პოტერის სერიიდან კიდევ ექვსი წიგნი გამოიცა, თითოეულმა რეკორდული წარმატება მოიპოვა.

2001 წელს Warner Bros.-მა გამოუშვა პირველი წიგნის კინოადაპტაცია, რასაც მოჰყვა კიდევ ექვსი წიგნის ადაპტაცია, რომელიც დასრულდა მერვე ფილმის, ''ჰარი პოტერი და სიკვდილის საჩუქრების მეორე ნაწილი'' გამოსვლით 2011 წელს.

ჯ.კ. როულინგმა ასევე დაწერა ორი მცირე თანმხლები ტომი, რომლებიც რომანებში ჰარის სასკოლო წიგნების სათაურებად გვევლინება. ''ჯადოსნური ცხოველები და სად ვიპოვოთ ისინი'' და ქვიდიჩის მრავალსაუკუნოვანი ისტორია'' გამოიცა 2001 წლის მარტში Comic Relief-ის მხარდასაჭერად. 2008 წლის დეკემბერში გამოიცა მესამე თანმხლები ტომი, „მგოსანი ბიდლის ზღაპრები“, მისი საერთაშორისო ბავშვთა საქველმოქმედო ორგანიზაციის, Lumos-ის მხარდასაჭერად.

2012 წელს დაარსდა ჯ.კ. როულინგის ციფრული კომპანია Pottermore, რომელიც 2019 წელს გახდა Wizarding World Digital. Pottermore Publishing კვლავაც არის''ჰარი პოტერი'',''ჯადოსნური ცხოველების და ჯადოსნური სამყარო'' გლობალური ციფრული გამომცემელი.

ასევე 2012 წელს, ჯ.კ. როულინგმა გამოაქვეყნა თავისი პირველი რომანი ზრდასრულებისთვის, სახელწოდებით ''შემთხვევითი ვაკანსია'' რომელიც ამჟამად 44 ენაზეა თარგმნილი და BBC-მ ტელევიზიისთვის 2015 წელს ადაპტირება მოახდინა.
რობერტ გალბრეიტის ფსევდონიმით, ჯ.კ. როულინგი ასევე წერს კრიმინალურ რომანებს, რომელთა მთავარი პერსონაჟია კერძო დეტექტივი კორმორან სტრაიკი. პირველი მათგანი,''გუგულის ძახილი'', კრიტიკოსების მოწონებით გამოიცა 2013 წელს, თავდაპირველად ავტორის ნამდვილი ვინაობის გამხელის გარეშე. ამას მოჰყვა „აბრეშუმის ჭია“ 2014 წელს, „ბოროტების კარიერა“ 2015 წელს, „მომაკვდინებელი თეთრი“ 2018 წელს, „პრობლემური სისხლი“ 2020 წელს, „მელნის შავი გული“ 2022 წელს და „მორბენალი საფლავი“ 2023 წელს. სერიალი ასევე ადაპტირებულია ტელევიზიისთვის BBC-სა და HBO-ს მიერ.

ჯ.კ. როულინგის 2008 წლის ჰარვარდის გამოსაშვები გამოსვლა 2015 წელს გამოიცა ილუსტრირებული წიგნის სახით, „ძალიან კარგი ცხოვრება: წარუმატებლობის დამატებითი სარგებელი და წარმოსახვის მნიშვნელობა“ და გაიყიდა Lumos-ის და ჰარვარდის უნივერსიტეტის ფინანსური დახმარების მიზნით.

2016 წელს ჯ.კ. როულინგმა დრამატურგ ჯეკ თორნთან და რეჟისორ ჯონ ტიფანისთან ერთად ითანამშრომლა თეატრისთვის ორიგინალურ ახალ ისტორიაზე. „ჰარი პოტერი და დაწყევლილი ბავშვი, პირველი და მეორე ნაწილები“ ​​ლონდონში გამოვიდა და ამჟამად მსოფლიოს სხვადასხვა ადგილას იდგმება. სცენარის წიგნი გამოიცა პიესის პრემიერის აღსანიშნავად 2016 წლის ივლისში და მყისიერად მოექცა ბესტსელერების სიის სათავეში.

ასევე, 2016 წელს ჯ.კ. როულინგმა სცენარის დებიუტი შეასრულა ფილმით „ჯადოსნური ცხოველები და სად ვიპოვოთ ისინი“, რომელიც „ჯადოქრების სამყაროს“ შემდგომი გაგრძელებაა და კრიტიკოსების მოწონება დაიმსახურა 2016 წლის ნოემბერში. ეს იყო ახალი თავგადასავლების სერიის პირველი ნაწილი, რომელშიც მონაწილეობს მაგი ზოოლოგი ნიუტ სკამანდერი და რომლის მოქმედებაც ჰარი პოტერის დრომდე ვითარდება. მეორე ფილმი, „ფანტასტიკური ცხოველები: გრინდელვალდის დანაშაულები“, 2018 წელს გამოვიდა, ხოლო მესამე, „ფანტასტიკური ცხოველები: დამბლდორის საიდუმლოებები“ - 2022 წელს.

სცენარები გამოიცა თითოეული ფილმის გამოსვლისას: „ფანტასტიკური ცხოველები და სად ვიპოვოთ ისინი“ - ორიგინალური სცენარი (2016), „ფანტასტიკური ცხოველები: გრინდელვალდის დანაშაულები“ ​​- ორიგინალური სცენარი (2018) და „ფანტასტიკური ცხოველები: დამბლდორის საიდუმლოებები“ - სრული სცენარი (2022).

2020 წლის მაისში, ჯ.კ. როულინგის პატარა ბავშვებისთვის განკუთვნილი ზღაპარი „იკაბოგი“ უფასოდ გამოიცა ონლაინ რეჟიმში ბავშვებისთვის Covid-19 პანდემიის დროს, 2020 წლის ზაფხულში და ამჟამად გამოიცემა ბავშვების მიერ ილუსტრირებული წიგნის სახით, მისი ჰონორარები კი მის საქველმოქმედო ფონდ „ვოლანტს“ გადაეცემა, რათა დაეხმაროს საქველმოქმედო ორგანიზაციებს, რომლებიც ცდილობენ დაუცველი ჯგუფების, განსაკუთრებით ქალებისა და ბავშვების დახმარებას.

მისი უახლესი საბავშვო რომანი „საშობაო ღორი“, რომელიც დამოუკიდებელი სათავგადასავლო ისტორიაა ბიჭის სიყვარულის შესახებ თავისი ყველაზე ძვირფასი ნივთის მიმართ და იმაზე, თუ რამდენად შორს წავა ის მის საპოვნელად, გამოიცა 2021 წელს და ბესტსელერი გახდა დიდ ბრიტანეთში, აშშ-სა და ევროპაში.

ჯ.კ. როულინგი 2001 წლიდან დაქორწინებულია დოქტორ ნილ მიურეიზე. ისინი ედინბურგში ცხოვრობენ თავიანთ ვაჟთან, დევიდთან (დაიბადა 2003 წელს) და ქალიშვილთან, მაკენზისთან (დაიბადა 2005 წელს) ერთად.